محبي “كريستيانو رونالدو” العاطفة هتاخد قلوبهم وهتلاقيهم مدافعين عنه بشكل كبير وهيروح يشيل “تين هاج” والنادي الطريحة كاملة ، وبرضو أي حد ملوش عاطفة تجاه “كريستيانو رونالدو” هيبعد “تين هاج” والنادي خارج المعادلة ويخلي اللاعب يحاسب على المشاريب.
بس عشان أحاول أمنطق الموضوع .. فشخصياً شايف ان كل الأطراف مخطئين في الحكاية وإن محدش فيهم برئ ، القصة فقط ان “رونالدو” استسلم من تضييق الخناق وإتكلم .. لكن هو مش برئ ، وكذلك “تين هاج” تبقى مغفل لو طلعته برئ ..
نفس القصة على إدارة مانشستر يونايتد اللي هما قصة تانية من اللا براءة أصلاً.. “كريستيانو رونالدو” من بداية الموسم بدأ علناً في البحث عن نادي مشارك في دوري أبطال أوروبا وقدم طلب للرحيل بسبب صعود مانشستر يونايتد إلى اليوروباليج ، بمعنى آخر .. قرر ينط من المركب أول ما حس انها بتغرق .. وهنا النادي ومشجعيه لهم الحق في إحساس الخيانة من ناحيته ، خصوصاً بعد تصريحاته وقت التوقيع بإنه رجع بيته والكلام الحمصي ده .. ده غير طبعاً حدوث أكثر من مشكلة بينه وبين “تين هاج” على الملأ وعلى عينك يا تاجر وكذه مرة يصرح علناً عبر حساباته ، وأخيراً التمارض وعدم السفر في مباراة فولهام عشان هيكون برة اللاين أب .. فلأ ياعم كريس انت مش برئ وحاولت تخلع
“تين هاج” بقا .. في ناس كتير معندهاش عاطفة تجاه “كريستيانو رونالدو” فشايفين ان الراجل ده مش مخطئ ، بس بالعكس الراجل أخطأ أخطاء جسيمة كانت سبب في حالة الاحتقان الحالية ، أول خطأ ارتكبه “تين هاج” لما صرح علناً في بداية الموسم وقال “كريستيانو رونالدو ضمن خططنا للموسم الجديد ، فيما معناه ان اللاعب دوره هيكون محوري جداً وهيتم الاعتماد عليه بإستمرار ، ايه اللي حصل ؟ “كريستيانو رونالدو” أصبح مجرد Plan B ومركون على الدكة ولما بيشارك دوره مش مفهوم أصلاً أو مطلوب منه يقدم إيه ، ودي أول أسباب عدم احترام “تين هاج” لرونالدو .. وهي أنه مكنش صادق من البداية وقراءته للوضع كانت خطأ .. بلى وضعه في مرمى مدافع السخرية من الجمهور في كل المنصات.
نيجي للخطأ الثاني وده الكارثة بالنسبة لي ، نوعية “كريستيانو رونالدو” أو السوبرستار دي نوعية (مدللة) من الآخر ، التعامل معاها في غرفة الملابس لازم يكون بذكاء كبير وإنك تكسبها في صفك كمدرب بحيث يكون قائد من قادة غرفة الملابس الداعمين لمشروعك ، ده بلس انه قدوة لبعض اللاعبين الصغار زي “جارناتشو” مثلاً ، يعني لو أخد وضعه في غرفة الملابس وتم الحديث معاه بإستمرار ككابتن هيكون “تين هاج” كسبان “كريستيانو رونالدو” بالـLeadership بتاعته وهيكون “رونالدو” حاسس بالاحترام من ناحيته وهيكون راضي بقرارته كمان .. يعني End of it.
انما لما الوضع يكون تجنب اللاعب بإستمرار ومعاملته زي البقية وترك زملاؤه يتكلموا عليه وهز صورته أمامهم لأنه في الأول والآخر رغم عنه (أسطورة) .. ده كان بداية النهاية ، التعامل مع “رونالدو” على ان زيه زي “إيلانجا” مثلاً ده مش احترافية ومساواة بين اللاعبين ، ده عبط وأبعد ما يكون عن الدبلوماسية وذكاء السيطرة على غرفة الملابس وقدرة احتواء النجوم ، وتحليلي الشخصي هو إن “تين هاج” حب ينفرد تماماً بالسيطرة المطلقة على غرفة الملابس من غير ما يكون في أصوات ثانوية من كباتن آخرين ، “كارلو أنشيلوتي” مثلاً بيعجبني جداً في كيفية احتواء النجوم والتعامل معاهم بشكل خاص بيخلوهم يثقوا فيه جداً ويحبوه ويقتنعوا بقرارته
فلأ يا عزيزي ، “تين هاج” مش برئ إطلاقاً ، بل مساهم بشكل كبير في المهزلة الحالية دي بنسبة خطأ ليست بعيدة عن نسبة “كريستيانو رونالدو”
نيجي لإدارة مانشستر يونايتد ، ناس كتير متعرفش ان الملاك محدش كان بيربيهم بمعنى كلمة يربيهم غير ( السير أليكس فيرجسون ) ، وإن لولا الراجل الكبارة الاسكتلندي ده مش بس النادي مكنش محققش بطولات ، ده كان النادي زمان حالته زي أندية عريقة كتير وقعت في التشامبيونتشيب بسبب سياساتهم السطحية ، حتى كل مدير رياضي بيشتغل في النادي بيكون كلاون اكبر من اللي قبله ويمكن “إد ودوارد” ده سيرك بحاله محدش يقدر ينسى كم الفلوس اللي رماها في الأرض.
“رونالدو” قال إن مفيش حاجة إتغيرت من بعد السير ، إدارة مانشستر يونايتد لسه مش عارفة هي كمان كيفية التعامل مع سوبرستار وإن تدليله وحمايته من الميديا جزء أصيل من التعاقد معاه ، اللاعب كان محتاج دعم بعد وفاة طفله غير المولود بجانب مرض ابنته وده حسب كلامه أثر عليه نفسياً خصوصاً انه وجد الدعم من جماهير الـRivals ليفربول في ملعب أنفيلد لما غنوا له في الدقيقة 7 ( لن تسير وحدك أبداً ) .. بس ملقاش الدعم ومحدش وقف جنبه من ادارة اليونايتد وده كان بداية شعوره بالخيانة ، ده بجانب ان إدارة اليونايتد جعلت سيرة “كريستيانو رونالدو” مستباحة يمكن من قبل ما تبدأ حركة أخبار لفه على الأندية المشاركة نادي نادي.
“رونالدو” أخطأ بالفعل ، لكن تم دفعه للإنفجار في النهاية برضو بأخطاء من الأطراف الأخرى .. في النهاية ده مجرد رأي شخصي ممكن يبقى في اتفاق او اختلاف .. بس من الصعب أشوف شخص برئ في القصة كاملة..
اقرأ أيضًا : كريستيانو رونالدو يتعرض لموقف محرج والتحفظ على سيارته الخاصة
