في آخر 17 مباراة “زيزو” سجل 14 هدف وعمل 11 أسيست .. ساهم في 26 هدفًا ! مظنش ان في لاعب داخل أفريقيا حالياً قدم أرقام مشابهة أو قريبة منه .
زيزو بعيداً عن اقرب لاعب في مصر مش واصل حتى لنصف مساهماته في مجموع التسجيل والصناعة.
يمكن كل تابوهات الاستوديوهات في مصر بإن الوينج لازم يسجل كتير او يصنع كتير “زيزو” ضربها في مقتل ، حتى على مستوى المراوغة في مواقف التفوق النوعي اتحسن كتير جدا وخلق لنفسه حل إضافي
“زيزو” كسر قالب اخر كان ملازمه منذ وصوله للزمالك ، وهو إنه جناح خط فقط ، منذ تحرير “فيريرا” له واجباره على التحرك أكثر في انصاف المساحات بدل من الأطراف “زيزو” توهج بشدة وفعاليته في اللعب المفتوح تزايدت بشكل كبير.
يمكن للأسف منصات الاحصائيات في مصر محدودة جدا لأن حقيقي كنت اتمنى أوجد معدل xT الخاص بزيزو أو معدل Expected Threat ( التهديد المتوقع ) ، وهو نموذج يستهدف الخطر المتوقع من حيازة اللاعب للكرة او من تمريراته.
واثق طبعاً ان “زيزو” هيتصدر وبفارق كبير لأن في كل Ball Carrying بيعمله أو تمريرة مفتاحية بيقدمها في إمكانية مش قليلة لصناعة فرصة هدف ، الدليل على كده هو تصدره لإحصائية الاكثر صناعة للفرص في الموسم المنقضي برصيد 93 فرصة ..
المبشر بخصوصه ان لسه عنده زيادة كمان ، عملية إطلاق العنان اللي عملها “فيريرا” في حقه وفتحت له أبواب كتير من الإضافات الفنية لمصلحة هيكل الزمالك بشكل عام .. لسه تقدر تخلي “زيزو” منتج أكتر لو الأفراد اللي حواليه قريبين ولو بشكل بسيط من جودته
“فيريرا” هيستغل اعادة تجديد دماء خط الوسط بـ3 عناصر جديدة في مساعدة “زيزو” على إنتاجية أعلى وإعفاؤه من أدوار كتير كان بيضطر يساعد فيها في اول مرحلتين لعب بسبب محدودية الخيارات في خط الوسط
المهم ان الموسم الإفريقي فرصة مثالية إن اللاعب يبدأ يستكشف فورمته الحالية في مستوى تنافسي أكثر صعوبة من الدوري المصري.
البداية كانت جيدة جدا أمام فلامبو البوروندي ، لكن لسه في مباريات أصعب ومنافسين اكثر شراسة منتظرين الزمالك في دور المجموعات هتكون فرصة لـزيزو انه يبدأ يستكشف نفسه امامهم ويطور أكثر من فعاليته.
