المفترض أن الهدف من إنشاء وتأسيس قناة الزمالك كان تكوين ظهير إعلامي للنادي ومنصة قوية تكون سبب في الدعم التسويقي والإعلامي للنادي ، وإن النادي يحصل من خلالها على ربح مالي مساهم في تحسين الحالة الاقتصادية للنادي
ومن خلال القناة يعرف كل المتابعين أخبار النادي الحصرية والخاصة بفريق كرة القدم بكافة مراحله السنية بجانب باقي الألعاب الرياضية بكافة قطاعاتها ومراحلها السنية ، وده تجنباً للإشاعات والاخبار الزائفة ومنع اي فرصة لأي شخص يستهدف احتراق النادي إعلامياً
الهدف من وجود قناة الزمالك كمان هو استغلالها في تقديم مواد إعلامية تليق بالمشاهد من خلال برامج التحليل واستضافة نجوم الفرق في كل العاب وتكون منصة حقيقية للشباب الزملكاوي للمشاركة بآراؤه بناء على حبه وعشقه للنادي ، ويمكن دي الحاجة الوحيدة اللي شوفناها في برامج زي “فن وهندسة” وبرنامج نهارك أبيض.
الهدف كمان من وجود القناة كان نشر وتوعية جمهور الزمالك والمتابعين بتاريخ وتراث النادي من خلال بعض البرامج اللي من خلالها تذاع كل المباريات التاريخية من الأرشيف زي ما حصل قبل كده مع “مايكل أيوب” ، بجانب تفاصيل تاريخ النادي نفسه منذ لحظة التأسيس والمجالس المعينة واللحظات التاريخية في فترة كل مجلس
شايف كل اللي انا قولته فوق ده ؟ .. ده النموذج الطبيعي لأي قناة نادي في الدنيا ، السؤال هنا بقا .. هل ما سبق ده تحقق ؟ معتقدش تحقق مما سبق غير نسبة 30% مثلاً على الأقل
لكن في المقابل ظهرت برامج آخرى خبيثة أصبحت بمثابة سيرك قومي ، مقدمي البرامج دي لا عندهم حضور إعلامي ولا عندهم قبول عند المشاهد ، مهاراتهم أمام الكاميرا ضئيلة ومحدودة ومثيرة للإشمئزاز من كم السماجة الطافحة منهم ، لحد ما اكتسبت البرامج دي سمعة البرامج الكوميدية وأصبحت السوشيال ميديا تتناول كلامهم بسخرية
لكن ما زاد الطين بلة..
هو ظهور رئيس النادي مرتضى منصور يومياً بشكل مسائي يستهدف الحصول على مشاهدات من خلال تصفية معاركة الشخصية بالسب والقذف المباشر على الهواء بشكل فاضح ومقرف ودون إحترام لشكل النادي وشكل قناته بعد ما تحولت من ظهير إعلامي للنادي إلى منصة للسب والقذف المباشر والضيوف فيها هم أصدقاء وأحباء سيادة المستشار راضين وصامتين بهذا السيرك لوجودهم تحت جناحه
الأسوأ هو…
ابتعاد القناة عن قضية الزمالك ، رئيس النادي أصبح يخرج للحديث عن قضايا مجتمعية لا علاقة لها بالزمالك من قريب ولا من بعيد .. للدرجة دي احنا فاضيين ؟ ، نطلع نهاجم “حسام حبيب” و”شيرين” و”عمرو أديب” ؟ طب ايه علاقة الزمالك او دخله بحاجة زي دي ؟ ليه رئيس النادي يتحدث في امور زي دي وبالأسلوب ده على الهواء في قناة النادي ؟
أسالك سؤال أهم ؟
ليه رئيس النادي يطلع أساساً ؟ انت كام مرة في السنة بتشوف رئيس اي نادي في العالم ؟ “فلورنتينو بيريز” مثلاً محدش بيشوفه غير وقت الصفقات ومحدش بياخد منه تصريحات غير مرة في موسم كامل ، طب ملاك الاندية في اوروبا ومدرائها الرياضيين .. بتسمعهم بيتكلموا ؟ طب بتشوف رئيس نادي في مصر كثير الظهور والتصريح كده ؟
فين هيبة وكاريزما ووقار رئيس النادي اذا كان ظهوره غزير بالشكل ده لأنه عاشق ومحب للكاميرا والمشاهدات ؟ فين حق الزمالك عليك كرئيس نادي بإلتزام الهدوء والصمت والتزام الحدود في الحديث والتحدث بشكل لائق وعدم السب والقذف بالشكل ده احتراماً للنادي ولقناته اللي هي ظهيره الإعلامي بدلاً من تحويلهم إلى مضحكة ومسخرة السوشيال ميديا على مستوى العالم العربي مش مصر فقط ؟
أنا الحقيقة بشوف الفيديوهات دي مش بضحك .. لكن بتحصل حالة اشمئزاز صعبة ومعاها إحباط شديد لا يوصف ، حقيقي الشخص الأسوأ في تاريخ الرياضة المصرية وضمن أسوأ الشخصيات في العصر الحديث بدون مبالغة .. بروفايل محدش يحب انه يتكرر مرة أخرى في الحياة أبداً
