مراحل اللعب 4
١ – الهجوم
٢ – الدفاع
٣ – التحول الهجومي
٤ – التحول الدفاعي
كل مدرب بيتمني يحصل علي اللاعب اللي قادر يكون ملتزم تكتيكيا في ال 4 مراحل كلهم ، يقدر ينفذ التعليمات بالحرف في ال 4 مراحل ، بخلاف كدة تكون جودته تسمح يكون متوهج في ال 4 مراحل حسب السياق التكتيكي و الهيكل اللي بيلعب داخله ..
بعيدا عن مركز الجناح لأن المركز شئ و الادوار شئ اخر
المركز ما هو الا ادراك للتواجد ، انت موقعك فين مش اكتر ، و ليكن الجانب الايمن ، الايسر ، العمق و هكذا
اما الادوار فهو السلوك اللي بتتبعه و انت في الملعب طبقا لتعليمات المدرب ، بتعمل ايه و بتتصرف ازاي مع تواكب المواقف عليك و فعلا قادر تدرك كلام المدرب ليك جوة الموقف نفسه ولا بتنعزل فكريا و مش بتقدر تتصرف مع انك كجودة ممكن تقوم ب ده ..
كولر ادرك تماما اهمية كريم فؤاد في الملعب و قد ايه اللاعب ده عنده قدرات يقدر من خلال السياق التكتيكي انه يكون كفء في جميع المراحل و قادر علي اتقان الشئ نفسه اللي بيتطلب منه ” الادوار ”
في مرحلة الهجوم ، كولر ادرك قوة التحرك بدون كرة بالنسبة لكريم ، و بالتالي لابد من ان يكون عنصر الفوضي داخل دفاعات الخصم لانه في حالة حركية مستمرة و توقيت تحركاته متناسب طرديا مع قراءته للمشهد بتفاصيله ف قادر يروح للمساحة الصح في الوقت الصح ” Right place , Right time ”
فاقدر اجمع لعب في العمق و العب بينية تجاه المساحة اللي بيتحرك تجاهها كريم و استبق المدافعين في القرار ، قادر العب تمريرة مباشرة عمودية تجاهه جوة المساحة لان كدة كدة هو محتل للمساحات عن طريق قرارات تحركية مبكرة قبل ادراك المدافعين ..
فانا مش بقول كريم فواد سريع ، هو مش سريع اوي بالمناسبة ، لكن تسارعه او بنقول عليها العجلة Acceleration هو ده اللي بيفرق و بيخليه سباق دايما للمساحات ..
كل ده بخلاف انه سايب الخط بالكامل لانطلاقات اكرم و هو متوجه داخليا بصورة كبيرة كإنه مهاجم تاني بجانب المهاجم الرئيسي ف قادر في مرات ينزل من ممر داخلي يفتح خيار تمرير لنفسه و يسحب مدافعين في ضهره و يفرغ مساحة ، قادر في مرات تاني يعمل كثافة في العمق لانه في مراحل الانهاء بيمتلك الجودة ويقدر ينهي فرص كتير بتتخلق ..
في مرحلة الدفاع انا بنفذ نهج الضغط العالي ، العناصر الامامية وظيفتها هيا مطاردة الكرة و حاملها ، العناصر الخلفية وظيفتها مطاردة الخصم ، كريم فواد لابد من ان يكون عنصر امامي لان زي ما قولتلك تسارعه مميز ف قادر يقدم نسق للضغط سريع و قادر يطارد الكرة بنجاح ف انا قادر من خلاله اجبر و اوجه الخصم يلعب كورته في مناطق معينة ، يا اما هفتك الكرة من خلاله ، يا اما هفتك الكرة عن طريق فرد اخر و كدة كدة كريم هيروح في المساحة وقت الافتكاك ف اقدر اوصل لموقف انفراد بسببه ..
لو روحنا لمرحلة التحول الدفاعي ، فكريم عنصر حركي زي ما قولنا ، قادر يرتد دفاعيا بشكل كبير و يقدم كثافة مع اكرم في الجانب الايمن بخلاف قوته الدفاعية في الافتكاك ف قادر يعطل الظهير و يفتك منه الكرة و منها نوصل لمرحلة التحول الهجومي مرة اخري و الاعتماد علي نقطة التسارع دي اللي قولناها ف قادر اعمل مرتدات من خلاله و اهاجم اكبر قدر مساحات من الخصم من خلاله ..
بخلاف بعض الامور التقنية بحيث لو قابل مدافعين في سكته هو قادر الي حد كبير يموه بالكرة و يغالط المدافعين في الاتجاه اللي هيتحرك من خلاله ، بالبلدي بيودي الكرة شمال و يمين مع ميل جسدي ..
بخلاف انه بيقدر ينهي الهجمة بشكل جيد ، يمكن احسن من شريف و حسام كمان ، ف لو المهاجم ضيعلك فرص ، كريم يقدر يعوض ده بشكل كبير ..
اسيست هدف الفوز في مباراة الإسماعيلي
هدف في مباراة الزمالك
هدفين و اسيست امام الداخلية
بخلاف فوزه ب ٦ التحامات ارضية من اصل ٨
سدد ٥ تسديدات منهم ٤ علي المرمي ، واحدة منهم خبطت علي القائم
راوغ ٤ مرات بشكل صحيح من اصل ٥
صنع ٤ فرص في المباراة ، التاني في المباراة بعد قفشة اللي صنع ٨ فرص
عايز تصنع فوضي ، كلم كريم فؤاد وبس.
