محمد علاء يكتب : فيريرا .. وإعادة ترتيب الأوراق!!

طريقة 3-5-2 التي أصر عليها “فيريرا” في السوبر كانت سبب كبير في الشكل المتحفظ اللي ظهر به الزمالك، لأن الطريقة غير مناسبة للفريق بسبب محدودية جودة وقدرة الأدوات.

طريقة 3-5-2 لها أكتر من شكل مشتق ، ممكن تبقى 3-5-2 Holding بتحول ثلاثي الوسط إلى مثلث مقلوب رأسه لاعب ارتكاز دفاعي Holding Midfielder ، وممكن تبقى 3-5-2 بمثلث معدول رأسه صانع ألعاب.

الطريقتان كده كده عاوزين نفس المتطلبات ، ظهيرين على مستوى عالي من التقنية والقدرات الهجومية ، محاور مميزة في أدوار الممرات والـDouble Pivot وأحد المحاور يكون مميز في أدوار الريچيستا بجانب ضرورة ان يكون احد قلبي الهجوم مميز في دور اللاعب الحر والمهاجم الوهمي.

في إنتر ميلان مثلا “سيموني إنزاجي” بيلعب بنفس الطريقة ، بس في الوسط عنده محورين مميزن هجومياً بجانب الـHolding ، وعنده أظهرة هجومية جدا وأحد قلبي الهجوم لازم بيأدي دور المهاجم الحر ، عشان كده على المستوى الفردي الهيكل فيه توازن كبير لأن متطلباته متوفرة.

النقطة التانية ان الطريقة دي بتتطلب مساهمة هجومية قوية من الظهيرن ومحورين الوسط في الطريقة الـHolding او صانع الالعاب وأحد المحورين في الطريقة الـAttack بحيث يكون الفريق عامل كثافة عددية في الثلث الثالث وتزيد خياراته الهجومية بشكل ملحوظ

المشكلة هنا في الزمالك ايه ؟

🔹جودة الأفراد ليها عامل مش قليل لتطبيق الطريقة دي ، على الأقل انت محتاج 2 من “إمام عاشور” عشان تنجح الطريقة ، في نفس الوقت انت محتاج ظهير وينج باك زي “فتوح” في اليمين ، “روقا” ريجيستا متطور المستوى لكن انت هتحتاج جودة أعلى ، “زيزو” كده كده قايم بدور الرجل الحر.

🔹 الكثافة العددية في مراحل اللعب المختلفة ، أكبر ميزة ممكن تضاف لأي فريق هي تعدد الخطوط ، كل ما خطوطك تكتر كل ما إمكانية التدرج بتزيد ، عشان كده في انتر ميلان الطريق بتكون مشتقة وبتتحول إلى 3-3-2-2 ، وده بيحصل لما المحورين يزيدو في انصاف المساحات ويبقوا على خط رأسي مع المهاجم من أمامهم وقلب الدفاع من خلفهم وقادرين من خلال تمركز ده يخلقوا مجموعات لعب ما بينهم وما بين المهاجم والوينج باك.

والمشكلة هنا ان الزمالك مش بيفرد خطوطه بل أفراده منتشرين على خط أفقي جنب بعض ، بالتالي عملية التدرج بتواجه صعوبات كبيرة ، ثم بالتبعية عملية الـCreation في الثلث الأخير بسبب الفقر العددي.

ايه الحل ؟

اول حل طبعاً هو العودة إلى 3-4-3 ، لأن من خلال الطريقة دي الزمالك قدر يخلق لنفسه أكتر من خط للتدرج الموسم الماضي وقدر يكسر تكتلات كتير .. احكيلك ازاي.

في الطريقة دي كان هيكل الزمالك بيتحول إلى 3-1-3-3 بمجرد ما “إمام عاشور” كان بيعمل الزيادة ويسيب محور الـHolding يغطي العمق الدفاعي ، وبوجود جناحين ومهاجم بجانب الـWing Backs كان الزمالك بيضغط بعدد كبير من اللاعبين.

أزيدك من الشعر بيت ، تفتكر ليه “المثلوثي” واخد ثقة “فيريرا” المطلقة ؟ لأن التونسي بيعمل دور مركب أثناء تواجد الزمالك في الثلث الأخير ، “المثلوثي” بيتحول من مدافع أيمن إلى ظهير أيمن وبيفتح الخط عشان يسمح للـWing Back الأيمن انه يتحول إلى جناح خط صريح.

ايه الفايدة ؟ الفايدة ان الجناح الايمن هيقدر يستلم اكتر في انصاف المساحات ويبقى اقرب للعمق والمرمى وهتتوفر له أكثر مواقف التسديد والصناعة والحصول على الأخطاء من اماكن مميزة.

ده اكبر سبب يعرفك أهمية العودة إلى 3-4-3 من جديد وليه الزمالك هيفوق بشكل كبير مع العودة إليها
ايه مانع “فيريرا” من العودة لها ؟ البروف معندوش ثقة في “روقا” اذا لعب في طريقة 3-4-3 لأنها بمحورين فقط ، “روقا” متواضع في المواقف الدفاعية وبوجود 3 محاور في طريقة 3-5-2 كان بيلاقي الدعم بسهولة ، لكن في 3-4-3 هيكون مع محور واحد فقط وهيكون “روقا” هو اللي متأخر عشان يقابل التحولات العكسية.

عشان كده بمجرد ما “دونجا” يكون جاهز “فيريرا” هيرجع بسرعة إلى 3-4-3 ملجأه وأمانه ، بس حقيقي المجازفة ضرورية بـروقا في 3-4-3 من الماتش الجاي حتى لو “دونجا” مش جاهز ، لأن الزمالك مينفعش يكمل بطريقة 3-5-2 أكتر من كدا مع تجلي عيوبها بشكل واضح ..