طريقة لعب 3-5-2 Holding مش هي المشكلة ، بالعكس الطريقة مميزة بس هي للأسف لها شروط زي أي طريقة لعب أخرى ، ملزمة بوجود 2 Wing Backs مميزين هجومياً ؟ .. ده أكيد.
لكن نجاح الطريقة مبني في الأساس على تركيبة خط الوسط وقابلية كل فرد فيها على تقديم أدوار مركبة بكفاءة عالية .. يعني مش بس بيقدر يقدم الأدوار المركبة .. لا لازم كواليتي وتقنية في التفاصيل دي.
تركيبة الوسط تحتاج ارتكاز دفاعي مميز في أدوار الريچيستا وفنفس الوقت جيد في الأدوار الدفاعية ، أما المحورين المساندين فلازم يكونوا مميزين في أدوار الممرات الداخلية Inner Corridors.
وبالنظر للتركيبة المختارة فى مباراة الزمالك أمام سموحة ، فهي مقدرتش تحقق المطلوب ، “زكريا الوردي” يقدر يلعب في المحور المزدوج Double Pivot ، فلو قررت تشركه في تركيبة ثلاثية ، يبقى الحل الوحيد انه يكون هو محور الارتكاز.
ليه ؟ لأن واضح على “الوردي” انه مش مميز في أدوار الممرات الداخلية ، لا هو Progressive Ball Carrier ولا هو مميز في المواقف الفردية أثناء الحيازة ، لكن هو جيد جدا كـDeep Lying Midfielder.
بالنسبة إلى “عمر جابر” ، فهو بالفعل بيقدر يعمل ادوار مركبة ، لكن عشان نكون واضحين برضو “عمر” مش بيقدم كواليتي يصنع الفارق برضو لأن سلوكه في الملعب مش خلاق أو مبدع ومائل دايما إنه يكون متوقع في قراراته.
إذا قررنا نعتمد على الطريق دي مستقبلا يبقى ضروري المحورين يبقى أحدهما “إمام عاشور” والثاني ممكن “عمرو السيسي” رغم أني أفضله اكثر في المحور المزدوج كذلك.
أنا مش بلوم على “فيريرا” لأن هو ده سلوكه بشكل عام في كيفية اكتشاف الأخطاء ومعالجتها ، واضح ان الشغل الفني طول الفترة الماضية كان على الأفراد أكتر من المجموعة.
لأن “فيريرا” يفضل العمل على المجموع أثناء ضغط المباريات بحيث ان اللاعبين يختبروا انفسهم جماعياً أثناء المباريات .. بالمناسبة “فيريرا” اتكلم عن النقطة دي في المؤتمر الصحفي انهاردة وان النسق الجماعي هيكون تصاعدي بالمباريات.
ان شاء الله مع دخول “عمرو السيسي” و”مصطفى شلبي” للسيستم في حاجات كتير هتتغير وهتتعدل وتتحسن جماعياً ، كل ما علينا إلا الصبر لأن احنا مش معانا مدرب صغير هنحاسبه بالقطعة .. ده “فيريرا” ..
يعني دوس على الإيجو بتاعك وإفهم ان مدربك الحالي تخطى مرحلة التقييم بالقطعة من زمان .. آخر حاحة هتتمناها إنك تكون مصدر ضغط على فريقك ..
