ناس طالعة تهاجم أحمد العوضي عشان عزم الراجل عامل النظافة على الغذاء، وفوجئنا كده مرة واحدة بالناس بتقول إن أحمد العوضي بيستغل الموقف وعايز يركب التريند، وناس قالت إن المشهد ده مع أحمد العوضي كان أثقل على عامل النظافة من المشهد اللي حصل معاه في محل الكشري !!!
بس اللي شايف الموضوع من الزاويا دي لازم يجاوب نفسه على الأسئلة دي
١- هو الراجل عامل النظافة اشتكالك وقالك إن المشهد مع أحمد العوضى ثقيل على نفسه ؟!
٢- هو أحمد العوضي ناقص شهرة عشان عايز يركب التريند ؟!
٣- هو انت فتشت في نية أحمد العوضي وعرفت إنه عايز ياخد اللقطة؟!
أنا شخصيا مبسوط من رد فعل الشارع المصري على طرد عامل النظافة من محل الكشري، ومبسوط جدا من اللي عمله أحمد العوضي، ولم أنظر لما فعله إلا من باب جبر الخواطر، وإنه حب يفهّم عامل النظافة إنه إنسان مهم في مجتمعنا، له كل الاحترام والتقدير على المهنة اللي بيزاولها، وما حسيتش للحظة واحدة إن العوضي عايز يركب التريند لأنه حرفيا مش محتاج أي شهرة عشان يتصرف بالطريقة دي…
ولو فيه حد هيتصرف بالطريقة دي مش هيكون أحمد العوضى، لأنه فنان مثقف ومتعلم كويس..
أنا شايف إن رد فعل الشارع المصري ورد فعل العوضي من نقاط قوة مجتمعاتنا العربية، اللي لازم نشتغل عليها وندعمها حتى تزداد ما بينا روابط الألفة والمحبة وروح التعاون…
سوء الظن من الصفات الرذيلة وأنا شخصيا أعتبره من الأمراض الأخلاقية، ومن غمر قلبه سوء الظن، لا يستطيع أن يرى الناس على حقيقتهم، ويغرق في بحور مظلمة من الكراهية والحسد، حتى يجد نفسه في النهاية معزولا، يكره الناس ويكرهونه…
الأصل في التعامل بين الناس حسن النية..
وكما يقول الله سبحانه وتعالى في كتابه الكريم:
“يا أيها الذين آمنوا اجتنبوا كثيراً من الظن إن بعض الظن إثم”
