ثقتي في “فيريرا” غير محدودة لسبب بسيط ملوش علاقة بالموسم الماضي أو الألقاب او سيطرته على غرفة الملابس .. دي كلها أسباب ممكن نتكلم فيها كلام نظري مرسل.
المدرب هو شخص منوط به تقليل نسبة الصدفة ، شخص منوط به يخلق المواقف في الملعب ، لأن بدون مواقف كرة القدم جامدة ومتصلبة وغير خلاقة
السبب الرئيسي فعلاً في تفوق الزمالك الموسم الماضي هو إيجاد “فيريرا” لآلية خلق المواقف المتعددة خلال حيازة الفريق
ازاي قدر يخلق مواقف تفوق عددي في اماكن كتير من الملعب ساعدته على انجاح منظومة الضغط أو سرعة استعادة الكرة او خلق لاعب حر إضافي لضرب التكتلات
ازاي قدر يخلق مواقف تفوق نوعي جعلت لاعبين زي “أحمد سيد زيزو” و”سيف الدين الجزيري” و”إمام عاشور” يتوهجوا فنيا لأنهم وجودوا المواقف الفردية المفضلة لقدراتهم وإمكانياتهم.
ازاي قدر يخلق مواقف تفوق مركزي عززت من قدرة على صناعة الفرص سواء من الأطراف أو العمق مستغلا كل الممرات الممكنة عشان تنجح العملية.
طبعاً الكلام ده هحاول أشرحه في ثريد تحليلي أكثر تفسيراً .. لكن اللي حابب اقوله ان الكلام ده موجود على أرض الواقع والمدرب فعلا بيحاول يطبقه ويطور في لاعبيه تقنياً عشان السيستم كليا ينجح في خلق المواقف دي.
عشان الزمالك يتمرس في الجزئية دي ويستمر في عملية تطوره التيكتيكية الموسم ده واللي جاي ، لازم نكون صبورين قدر الإمكان خصوصاً ان في شواهد كتير على عملية التطور منذ توقف يونيو الدولي.
