الحكومة النهاردة وافقت على قانون مهم جدا وهتضرب بيه أكتر من عصفور بحجر واحد هتحل بيه أزمة نقص المعروض من الدولار وهتزود احتياطات مصر من النقد الأجنبي وكمان هتعمل انفراجة كبيرة فى سوق السيارات اللى الاوفربرايس وصل فيه على بعض انواع السيارات لأكتر من نص مليون جنيه.
ايه هو القرار ده بقا؟
بص يا سيدي لو حضرتك مصري ومقيم فى الخارج سنك مش أقل من 15 سنة معاك اقامة سارية وعندك حساب بنكي مر على فتحه 3 شهور تقدر تشوف اى ماركة عربية انت عاوز تشتريها وتجيبها مصر وهتدخلها من غير ما تدفع جمارك ولا ضرايب ولا أى رسوم من الرسوم المعمول بيها دلوقتي
طب ده مقابل ايه .. ما اكيد الحكومة مش هتحدف كتاكيت يعني ؟
معاك حق طبعا .. الحكومة هتاخد منك فلوس بس برضوا انت الكسبان فى الصفقة دي .. وهقولك ازاى؟
مشروع القانون اللى وافقت عليه الحكومة وهتبعتوا للبرمان عشان يقره بينص على اعفاء سيارات العاملين فى الخارج من كافة الرسوم مقابل ان المصري المقيم فى الخارج هيحط قيمة الرسوم اللى كان مفروض يدفعها فى حساب وزارة المالية المصرية بقيمتها بالعملة الأجنبية وهتتربط لمدة 5 سنين من غير ما ياخد عليها اى فوايد وبعد الخمس سنين ما تخلص هياخد الفلوس اللى سددها كاملة لكن بسعر الدولار الرسمي وقت ما حطها فى الحساب.
مثال:
حضرتك مصري تعمل فى الخارج وهتشتري عربية كيا سبورتاج وي اللي في الصورة اللي تحت دي مثلا .. وجماركها وضرايبها 400 الف جنيه مصري يعنى حوالى 20 الف دولار وفقا لسعر صرف الدولار النهاردة 20 جنيه .. هتحط المبلغ ده فى حساب وزارة المالية ومش هتعرف تاخده تاني غير بعد مرور 5 سنين ووقتها هتشوف سعر الصرف الرسمي كام وهتاخد قيمة المبلغ بالجنيه المصري هنفترض مثلا الدولار بقا ب 25 جنيه حضرتك هتاخد 500 الف وهكذا
طب هتقدر تشترى اى عربية؟
وفقا لمشروع القانون العربية اللى هتشتريها من غير مالكها الأول لازم ما يكنش فات على تاريخ تصنيعها أكتر من 3 سنين
وعملية الشرا هتتم ازاى؟
الحكومة المفروضة هتدشن موقع اليكتروني واى مقيم فى الخارج عاوز يدخل عربية مصر هيسجل بياناته، وبيانات السيارة المطلوب استيرادها وهيسدد المبلغ النقدي المنصوص عليه، وهيُمنح فى مقابل ده موافقة استيرادية تثبت السداد وبيانات السيارة
والموافقة هتكون صالحة لاتمام إجراءات الاستيراد والإفراج عن السيارة المستوردة لمدة عام ميلادي من تاريخ صدورها.
طب لأى ظرف ما عرفتش تخلص عملية الاستيراد؟
حقك محفوظ .. وتقدر تسترد المبلغ النقدي اللى سبق وسددته فوراً بنفس القيمة والعملة المسدد بيها بس من غير اى فوايد على المبلغ.
فكرة هايلة لو اتنفذت بدون تعقيدات هتوفر للدولة مليارات الدولارات والكل فيها كسبان
الحكومة اللى هتاخد وديعة بدون فوايد لمدة 5 سنين تقدر تشغلها وتستفيد منها من غير اى تكلفة
والمقيم فى الخارج اللى هيجيب عربية سعرها مريح ومش هيدفع عليها اى رسوم وفلوسه هترجعلوا بعد 5 سنين وحتى لو حصل ارتفاع فى سعر الدولار فلوسه هتزيد وهيكسب كمان.
