عندي مشكلة بسيطة بس ومش قادر أتخطاها بصراحة مع مدافع نادى الزمالك محمد عبدالغنى .. المدافع بالنسبة لي مش بس مهارات دفاعية بس لأن كده كده في فوارق في الجودة بين المدافعين ، المدافع بالنسبة له حاجتين مينفعش ميبقاش لهم وجود تحت اي ظرف.
أولاً “الوعي الدفاعي” ، انك تكون واعي بتمركزك وحركة المنافس حواليك وحركة ومسارات الكرة وتحدد المرجعية المناسبة لكل موقف عشان تتدخل بشكل صحيح.
ثانياً “الحدة” ، المدافع لو معندوش حدة وشراسة وقوة مفرطة في كل أكشن من ردود فعله يبقى مدافع بالبلدي طري زي ( المارشميلو ) ، هيخسر كل ثنائياته ومواقف الواحد على واحد زي صباح الخير كده
“محمد عبدالغنى” عنده إمكانيات مش قليلة كمهارات دفاعية وده له شواهد كتير ، لكن بعد 5 سنين لعب للزمالك تقريباً لسه زي ماهو من ناحية عنصر الشخصية ، مدافع أليف لأبعد الحدود ، مش كل الثنائيات ملكه ، ولا حتى كل تدخلاته صحيحة ولا في قوة مفرطة ولا شراسة ولا حدة حتى.
“محمود الونش” بالنسبة له غول بالمعنى الحرفي ، حتى “حسام عبد المجيد” نفسه شتان الفارق بينه وبين “عبد الغني” .. انا هنا بكلمك عن الحدة بس خلي بالك.
جزئية الوعي الدفاعي دي حكاية تانية بقا ، تقريباً بسببها لازم يقدم هدية للمنافس كل ديربي بمنتهى السذاجة ، كأنه مش موجود في الماتش أصلاً وبيتفاجئ زينا ، كم أخطاء مركزية غير عادية كل مباراة ، قرارات خطأ في أوقات كتير بتكلفه أكشنز خطأ برضو لأنه ذهنياً ضعيف ومعندوش قدرة يقاوم الضغط الجماهيري حتى.
أنا مش بكتب الكلام ده بدون سبب .. انا فعلا خاب ظني جدا في “محمد عبدالغنى” اللي هو من أكتر الناس خذلاناً ليا وكنت متوقع له يبقى مدافع دولي بعد أول سنة معانا .. بس هو رضي في النهاية بدور السنيد أو الرجل الثاني لدرجة ان الصاعد ابو 21 عام أصبح متوهج أكتر منه.. شئ مخزي الحقيقة.
