محمد علاء يكتب : ميسي خارج التوقعات !

عدم تقبلي لفكرة ان “ميسي” لاعب الأسيست ده  فى مباراة الأرجنتين وهولندا بدون أي Scan خلاني أعيد الهدف مرة وإتنين وتلاتة من بداية الهجمة ، المفاجأة بقا ايه ؟

“ميسي” مشافش “مولينا” أصلاً  “ميسي” معملش أي Scan تجاه “مولينا” قبل ما ما يستلم الكرة ولا حتى بعد ما إستلم الكرة وركض بها !!!

السؤال هنا بقا .. “ميسي” عرف منين مكان تحرك “مولينا” ؟؟ ازاي ترجم وإستنتج تحركه في المكان ده ؟؟ نسبة الحظ هنا معدومة يا جماعة لأن مستحيل أمرر تمريرة توصل بالحظ لحد أنا مش شايفه أساساً !!

استنتاجي الوحيد هنا ان “ميسي” مرر للمكان ده بشكل “تخيلي” بحت أو توقع فقط ان “مولينا” هيعمل Cut In ومش هيفضل فاتح الخط ، “ميسي” اعتمد بنسبة 95% على مدى جودة وعي زميله ! وقد كان

حاجة كمان .. المساحة اللي اتمررت لها التمريرة هي مكان تمركز “آكي” اللي هو كان سايبها عشان يضغط على “ميسي” .. فهل “ميسي” لما لاحظ خروج “آكي” من مكانه فهم ان المساحة دي اتكشفت و”مولينا” هيمرر لها ؟

الجزء التاني هنا في الحكاية هو الـDeceptive Pass (التمرير الخادع) الناتج عن التمرير عكس اتجاه الجسد خصوصاً بعد ما جعل نفسه مرجعية لمدافعي هولندا ومحدش فيهم أخد باله من تحرك “مولينا” القطري

اللي عمله “ميسي” في الهدف ده بكأس العالم مش منطقي ومش مفهوم ، محاولة آخرى منه يعرفك مستوى الـIQ عنده وإزاي هو ذهنياً سابق كل اللي حواليه فالملعب بمراحل.

للمزيد: موقع التعمير للتواصل الاجتماعي تابعنا علي فيس بوك التعمير