لست مقتنع بصراحة ان فيها أمل اشوف “إمبابي” إلى ريال مدريد في يناير او حتى الصيف المقبل ، “امبابي” كان قدامه فرص أسهل من دي بكتير يروح ريال مدريد ، مرة وهو نجمه ساطع في موناكو ورغم كدا اختار أموال باريس سان جيرمان ، ومرة وهو Free Agent ويقدر يجي بدون ما يكلف ريال مدريد وبرضو اختار أموال باريس.
فجزئية ان ريال مدريد هيركض خلف لاعب عقده لسه ممتد سنتين وقيمته السوقية 160 مليون يورو وبياخد سنوياً 50 مليون دي قصة مش منطقية بتاتا ، يعني معنى كدا ان ريال مدريد هيدفع فوق 200 مليون نظير الصفقة + مكافأة توقيع خرافية + امتيازات فلكية أكتر من العقد الاستثنائي اللي كان محضره في الصيف الماضي ، بيريز راجل مجنون بس ذكي لأبعد الحدود وعارف امتى يسحب أيده من أي حكاية مفيهاش مصلحة له.
بالنسبة لي كل اللي بيقال حالياً فرقعة اعلامية مصدرها بيئة اللاعب زي والدته اللي وكيلة اعماله ، هدفها أكيد الضغط على النادي لزيادة الإمتيازات أكتر او ان النادي أخل بإحدى بنود الإمتيازات فقررت بيئة اللاعب تضغط إعلامياً وصحفيا على النادي عشان يفي بوعوده المالية الخزعبلية.
لو ريال مدريد هيفكر يقتحم مسيرة اللاعب تاني .. ده لو حصل في رأيي .. ففي الغالب هيحصل في اخر موسم في عقده او وهو Free Agent فقط ، غير كدا ريال مدريد مش هيروح يدفع اضعاف ما كان هيدفع الصيف الماضي لمجرد ان اللاعب كان اهوج وكل تفكيره كان المال ثم المال ثم المال فقط ، غير كدا واقعياً انا شايف ان لا هو هيمشي ولا هو هيقدر يسيب الراتب المرعب والمخيف ده .. هما بس شوية شوشرة وإدارة باريس ما شاء الله أصلا ركبها تبخبط لو سمعت ان نادي إسباني هياخد منها حد.
آخر حاجة هقولها ، مفيش شك ان الفلوس هي أنفس المعادن في الحياة البشرية ، وطبيعي اي حد مكان “إمبابي” هيختار المال قبل اي حاجة ، لكن هرجع وأقول اللعب لريال مدريد مش هيصنع منك فقير .. هتفضل غني وبتاخد راتب فلكي برضو .. بس عندك فرصة حفر اسمك في التاريخ والوصول لمستويات فردية غير مسبوقة في مسيرتك ويكفي الأمر انك منافس ومرشح دائم لدوري أبطال أوروبا ، البقاء في باريس سان جيرمان عمره ما هيحقق شئ أكثر من زيادة الأصفار في حسابك البنكي .. لو دي العيشة اللي هو عايزها هو حر .. هو طريق لغير النجوم وغير الأساطير.
