أفرح في السنغال ليه بمناسبة الهزيمة أمام هولندا فى الجولة الأولى فى كأس العالم المقامة بدولة قطر ؟ ايه الفكرة ؟ عشان اللي عمله جمهوره في مباراة العودة أمامنا ؟ .. طب ما ده الطبيعي يا جماعة ! ذنب السنغال إيه اننا حولنا المدرج من مكان لمشجعي الدرجة التالتة المجانين إلى مشجعين مقصورة الاستاد بالنسبة لهم خروجة بيتفرجوا فيها على الماتشات بالمولتو والاندومي وكل واحد بيبقى ساحب مراته وعياله كأنه في حديقة الفسطاط !
ماهو جمهور السنغال عمل الطبيعي وداس عليك نفسياً عشان التأهل مش بس منوط بالكتشنة ولا الـ11 لاعب قد ما العامل النفسي له دور كاسح في معرفة مين صاحب السبق ومين هيقدر يركب ويـLead الجيم ، ومين هينهار نفسياً وركبه هتخبط في بعض وهيغلط معاها غلطات ناشئ.
احنا في مصر طمسنا شي مهم في اللعبة كان محدد جزء كبير من قوتنا كأندية ومنتخبات ، شئ اسمه “روح المدرج” كان بمثابة X Factor مرعب في كل مبارياتنا المصيرية ، مباراة الجزائر 2009 استاد القاهرة قبل هدف الملعب كان بيهتف بجنون ( كاااس العااالم كاااس العااالم) لحد ما ركبنا نفسياً وسجلنا هدف تاريخي بس محصلش نصيب بعده.
الحاجة التانية والمهمة
معتقدش اننا لو روحنا المونديال ولعبنا قصاد السنغال بدون نجمنا الأول ( محمد صلاح ) هنقدر نقدم ربع اللي قدموه قصاد هولندا ، ولا هتكون النتيجة 2-0 فقط .. السنغال لو ضاع منها نجمها الأول فهي برضو على الأقل عندها جحافل محترفين في مستويات كبرى واندية معروفة ، انما انت بدون “محمد صلاح” متسواش جنيه في سوق المنتخبات ولا هينفعك “كيروش” ولا “فيتوريا” ولا “بيب جوارديولا” حتى ..
الجمهور في مصر قطاع كبير منه وضيع للأسف وعقليته عايشة على حاجات منتهية من زمان والكورة سبقتها بسنين ضوئية ، الناس لسه مزنوقة في مرحلة زمنية بتقيس عليها كل شئ في الكورة .. مرحلة انتهت من عقود حرفياً.
